Ebisoko -Luganda Idioms – ENJOGERA N’EBISOOKO EBIGEERAGERANYA

Ebisoko -Luganda Idioms – ENJOGERA N’EBISOOKO EBIGEERAGERANYA

Ekisoko (Luganda Idiom)   –   Amakkulu (Meaning)

1. Awejjera ng’owoolufuba atakkuse lumonde – kukololakolola buli kadde

2. Atitibana ng’atuga omulalu – kukola kintu nga okankana

3. Okwebaka kaboleredde ng’omunafu omulekere obuliri – kwebaka nnyo

4. Kibula abuuza nga erigenda e mugga – kintu kuba nga kirabika

5. Weetema engalike nga akaabira abaafa edda – kukola kintu kitakyagasa

6. Weeringa ng’omunafu alima asalira – kukola bintu nga tebinyiridde

7. Weefunuggula ng’omunafu alima awagonda – kukola kintu nga okozesa amaanyi mangi naye ate nga tekyetaagisa kukozesa maanyi mangi

8. Atunula sseddoolo nga omukadde ayogereza – kutunula nga osobeddwa

9. Gujabagidde ng’omunafu azadde kaliira – mbeera kwonooneka

10. Okuba bulatti nga omussezi ali ku limbo – kubeera musanyufu nga tolina kikwerariikiriza

11. Okuyimba nga ennyonza – kuyimba bulungi

12. Okusitukiramu ng’eyatega ogw’ekyayi – kwanguwa kukoka kintu

13. Okuba mannyangwa nga lumonde w’omukibanja – butalabikalabika

14. Okufuga abantu nga obudde – kufuga bantu nga obatuntuza

15. Okuteeka nga aga Lubigi – kuba mu mirembe/muwombeefu

16. Okuyita kuli nga mufu y’awunya – kwewulira

17. Kusaambira mabega nga jjanzi – kusanyuka nnyo

18. Okutunula bakimpe nkirye gy’oli ab’emiryango tebakyagala – kutunula nga weegwanyiza/weeyagaliza

19. Okufunya emimwa nga ayita abaffe – kwogera nga ofunyizza emimwa

20. Okugabattukana nga agabana ebikaawa – kutambula ng’opapa ne bakwekokkola

21. Okwasaamirira nga agabanye ebikaawa – kutunula nga oyasamye

22. Okugaala emimwa nga ayita Ana – kwogera nga oyasamye

23. Okuginika amannyo ng’embwa eggya obubi mu ssubi – kuseka ne mu mbeera eteetaagisa

24. Okutunula kyamuli nga essalambwa ery’ensenke – kutunula nga towadde kintu birowoozo

25. Aseka bbuniza nga asaba bba enseko – kuseka nga weebwalabwala

26. Okwekuteera nga ayalira atajja – kukola kintu ekitagasa

27. Gumuli wamu ng’alya ne muganzi we eky’eggulo – kuba nga teweerariikirira

28. Gumuli ku mutwe ng’eyabuulira ow’olugambo – kweraliikirira

29. Ayogera nga gwebaasala akanyata – muntu kuba nga ayogera nnyo

30. Kalonda nga omusiri gw’omunafu – kuba nga bintu bingi biri mu mugotteko

31. Ayogera kirabika nga ow’ejjanga abika – kwogera kirabika

32. Atambula sserebu nga eyakwana ogw’okumpi – kwetala nnyo mu kifo

33. Okweyisa ng’owakagatto akamu – kwetala nnyo

34. Yeetiiyuula nga omuganzi atalina kabina – kukola kintu nga tofaayo ku balala kyeboogera

35. Akunaamiriza nga alega jjuule – kukutaamiriza

36. Akabina kamulinga ak’ensejjere eyingira enkata – kuba na kabina kaakikinala

37. Yakula butalaba nga kiwojjolo – kubeera nga byokola tebigya mu myaka

38. Kukuza mutwe nga mmale – kubeera nga byokola tebigya mu myaka

39. Amatama gamubyabyatadde nga lumonde omulinnyire mu mulyango – kuzimbya matama

40. Okulebera emimwa nga ccapati ennumeko – kulebera mimwa

41. Kutunula kalyolyongo nga embwa eyota ekikoomi – kutunula nga osobeddwa

42. Kutunula kimpeewuukirize ng’embwa erwazizza nnazaala – kutunula nga osobeddwa

43. Abyangatana nga Nnasaza agaba magera – kutuula nga osaasaagana

44. Okusitunkana nga gwebaloga ekiwunyo – kutuula nga osaasaagana

45. Ayuguuma nga balugu atannaba kukwata mutuba – kubeera nga otagala

46. Amaaso gamwesimbye ng’emmandwa y’engo – kukanula maaso

47. Akanula amaaso ng’enkoko enywa mu lwendo – kukanula maaso

48. Atolotooma ng’empanga enyweddemu mazzi amanaabe mu ku kyalo kwe –

49. kulidde – kugenga nga weemulugunya, nga tomatidde

50. Yewombeese nga eggole eririba ejjombi – ku mize nga okyali mugenyi

51. Atunula gammyanssa nga omufumbo amira agookya – kutunula nga ebizibu bikweraliikiriza

52. Yaddugala nga enzinziiri – kuba mudddugavu kagongolo

53. Yeetiiyula nga nnamwandu akuba embaala – kwessa ku byotosobola

54. Yeesimbye jjaali nga omusezi asusa eryenvu – kuyimirira butengerera

55. Okwesimba nga ssettaala mu lutobazi – kuyimirira butengerera

56. Okwebwalabwala ng’olubwa olubbi – kubeera nga weekomomma / weetya

57. Okwegiriisa nga ekigotta entula – kweyagala nga teri akugambako

58. Okweyagala ng’obulago bw’enkoko obutasibwamu mugwa(muguwa) – kweyagala nga oli mu mirembe

59. Okuniigiina nga sseddume eyasizza entamu nti bananfumbira wa? kukola nsobi ate n’otadda mabega kutereeza bisobye –

60. Okwereega nga akakammula kkwete – kwepanka ku byotaasobole

61. Okuyitirayo nga omulongoose – kugenda n’otadda